呢條問題，我們俾人問得最多。答案唔係立場，係一條數。今日同你計。
先計「買現成」嗰條數
現成 CRM 嘅賣點係快：今日簽卡，聽日有得用。但條數唔止月費咁簡單。
假設一間 8 人公司，每人每月 HK$250（中檔 plan 嘅常見水平；下面全部係假設例子，唔係任何供應商實價，請代入你自己間公司再計）：
- 每年 HK$24,000，五年 HK$120,000——而多數 SaaS 每一兩年加價一次。
- 加人加錢：生意做大請多三個人，條數即刻跳三格。你俾嘅唔係軟件錢，係人頭稅。
- 流程屈就工具：現成 CRM 係為「一般公司」設計。你的做法同佢個表格唔夾嘅位，唔係佢改，係你改。每一步屈就，都係同事每日嘅時間成本。
- 用三成功能，俾十成錢：大部分團隊只用到報價單同客戶名單，但你訂嘅 plan 連埋你永遠唔會開嘅二十個模組。
- 資料搬屋難：他日想走，export 出嚟嗰堆 CSV，未必搬得齊你啲跟進紀錄同歷史。
再計「自己砌」嗰條數
自己砌，前期成本高——係一筆過嘅真金白銀，冇得呃你。但買返嚟嘅嘢唔同：
- 唔按人頭收費。請幾多人用，都係嗰個價。
- 流程跟你，唔係你跟佢。你點做生意，個系統就點做。
- 要乜就砌乜：想張報價單自動變發票？想 WhatsApp 查詢自動入客戶紀錄？現成工具要逐個 plugin 夾（夾唔夾到係彩數），自己嘅系統直接砌落去。
- 資料永遠係你的，放喺你自己個資料庫。
- 仲有一樣近年變咗：AI 輔助開發之下，以我們自己的做法，以前要幾個月嘅系統，而家係幾星期嘅事。砌嘢嘅門檻，真係低咗好多。
幾時應該買現成（誠實講）
唔係個個都應該砌。以下情況，買：
- 流程好標準，冇乜特別要求——現成工具就係為你設計。
- 團隊三兩個人，月費肉痛極有限。
- 聽日就要用。
仲有一個誠實建議：未用過任何 CRM 嘅公司，先用三個月平價現成貨。你要先知道自己真正需要啲乜，先有資格諗砌唔砌。
幾時值得砌
- 按人頭月費開始肉痛，而且睇唔到掂頂。
- 你賣嘢嘅方式同人唔同，現成工具屈就到你想掉電腦。
- 你想個 CRM 唔止記客——仲要自動覆 WhatsApp、自動開單、自動跟進。
- 資料唔想放喺人哋度。
條數點計先啱
好簡單：兩邊都計五年。
現成：月費 × 人數 × 60 個月，加預估加價，加同事每星期屈就流程嘅鐘數 × 人工。 自己砌：一次過開發費，加每年少量維護。
五年埋單邊個平、邊個令你做嘢快啲——條數自己會講嘢。
計完如果現成贏，恭喜你，慳返筆。計完如果砌嗰邊贏——呢啲我們日日砌開。
想整類似嘅嘢？ 寫信俾我們：hello@tonric.com